ਖੇਤੀ ਵਜ਼ੀਰਾਂ ਦੀ ਜੋੜੀਚੌਹਾਨ ਦੇ ਅੰਗ ਸੰਗ ਚੱਲੇ ਖੁੱਡੀਆਂ..!ਚਰਨਜੀਤ ਭੁੱਲਰ
ਚੰਡੀਗੜ੍ਹ : ਕੇਂਦਰੀ ਖੇਤੀ ਮੰਤਰੀ ਸ਼ਿਵਰਾਜ ਚੌਹਾਨ ਵੱਲੋਂ ਅੱਜ ਪੰਜਾਬ ਫੇਰੀ ਮੌਕੇ ਖੇਤੀ ਮੰਤਰੀ ਗੁਰਮੀਤ ਸਿੰਘ ਖੁੱਡੀਆਂ ਪ੍ਰਤੀ ਦਿਖਾਏ ਸਨੇਹ ਨਾਲ ਸਿਆਸੀ ਚਰਚਾ ਛਿੜ ਗਈ ਹੈ। ਆਮ ਆਦਮੀ ਪਾਰਟੀ ਨੇ ਪੰਜਾਬ ਚੋਣਾਂ ਲਈ ਉਮੀਦਵਾਰਾਂ ਦੀ ਦੂਜੀ ਸੂਚੀ ’ਚੋਂ ਗੁਰਮੀਤ ਸਿੰਘ ਖੁੱਡੀਆਂ ਨੂੰ ਬਾਹਰ ਕੀਤਾ ਹੈ। ਉਸ ਮਗਰੋਂ ਸ਼ਿਵਰਾਜ ਚੌਹਾਨ ਤੇ ਗੁਰਮੀਤ ਖੁੱਡੀਆਂ ਦੀ ਇਹ ਪਹਿਲੀ ਮਿਲਣੀ ਸੀ। ਉਂਜ, ਚੌਹਾਨ ਤੇ ਖੁੱਡੀਆਂ ਦੀ ਨੇੜਤਾ ਪਹਿਲਾਂ ਵੀ ਕਿਸੇ ਤੋਂ ਗੁੱਝੀ ਨਹੀਂ ਹੈ ਪਰ ਅੱਜ ਦੋਵਾਂ ਆਗੂਆਂ ਵੱਲੋਂ ਇੱਕ ਦੂਜੇ ਪ੍ਰਤੀ ਦਿਖਾਈ ਗਈ ਅਪਣੱਤ ਸਹਿਜਤਾ ਦੇ ਰੌਂਅ ਤੋਂ ਉਪਰ ਸੀ। । ਭਾਜਪਾ ਆਗਾਮੀ ਵਿਧਾਨ ਚੋਣਾਂ ਦੇ ਮੱਦੇਨਜ਼ਰ ਗੁਰਸਿੱਖ ਅਤੇ ਚੰਗੇ ਰਸੂਖ਼ ਵਾਲੇ ਚਿਹਰਿਆਂ ਦੀ ਤਲਾਸ਼ ਵਿੱਚ ਹੈ। ਭਾਜਪਾ ਦੀ ਕੇਂਦਰੀ ਲੀਡਰਸ਼ਿਪ ਨੇ ਦੂਜੀ ਸੂਚੀ ’ਚੋਂ ਬਾਹਰ ਕੀਤੇ ਜਾਣ ਮਗਰੋਂ ਖੁੱਡੀਆਂ ’ਤੇ ਅੱਖ ਰੱਖੀ ਹੋਈ ਹੈ। ਹਾਲਾਂਕਿ ਖੇਤੀ ਮੰਤਰੀ ਖੁੱਡੀਆਂ ਨੇ ਪਾਰਟੀ ਦੀ ਟਿਕਟ ਵੰਡ ’ਤੇ ਤਸੱਲੀ ਜ਼ਾਹਰ ਕੀਤੀ ਹੈ ਅਤੇ ਕੋਈ ਵੱਖਰਾ ਰਾਹ ਅਖ਼ਤਿਆਰ ਕਰਨ ਦੇ ਰੌਂਅ ’ਚ ਨਹੀਂ ਹਨ।
ਖੁੱਡੀਆਂ ਪੰਜਾਬ ਕੈਬਨਿਟ ’ਚ ਇਕਲੌਤੇ ਗੁਰਸਿੱਖ ਚਿਹਰੇ ਹਨ ਜਿਨ੍ਹਾਂ ਨੂੰ ਪਾਰਟੀ ਨੇ ਟਿਕਟ ਨਹੀਂ ਦਿੱਤੀ।ਪੰਥਕ ਹਲਕਿਆਂ ’ਚ ਇਸ ਦੀ ਚਰਚਾ ਵੀ ਹੈ। ਕੇਂਦਰੀ ਮੰਤਰੀ ਸ਼ਿਵਰਾਜ ਚੌਹਾਨ ਅੱਜ ਖੇਤੀ ਮੰਤਰੀ ਖੁੱਡੀਆਂ ਦੇ ਨਾਮ ’ਤੇ ਮਨਜ਼ੂਰੀ ਪੱਤਰ ਲੈ ਕੇ ਆਏ ਜਿਸ ਤਹਿਤ ਪੰਜਾਬ ਨੂੰ 352.64 ਕਰੋੜ ਦਾ ਵਿੱਤੀ ਪੈਕੇਜ ਦਿੱਤਾ ਗਿਆ ਹੈ। ਚੌਹਾਨ ਨੇ ਮੁਹਾਲੀ ਦੇ ਪਿੰਡ ਬਦਰਪੁਰ ਵਿੱਚ ‘ਖੇਤ ਬਚਾਓ ਅਭਿਆਨ’ ਪ੍ਰੋਗਰਾਮ ਦੌਰਾਨ ਖੁੱਡੀਆਂ ਨੂੰ ਇਹ ਪੱਤਰ ਸੌਂਪਿਆ। ਸੂਤਰਾਂ ਅਨੁਸਾਰ ਅੱਜ ਜਦੋਂ ਚੌਹਾਨ ਇੱਥੇ ਹਵਾਈ ਅੱਡੇ ’ਤੇ ਪਹੁੰਚੇ ਤਾਂ ਉਨ੍ਹਾਂ ਨੇ ਕੁਝ ਸਮਾਂ ਹਵਾਈ ਅੱਡੇ ’ਤੇ ਖੁੱਡੀਆਂ ਦੀ ਉਡੀਕ ਕੀਤੀ। ਉਹ ਹਵਾਈ ਅੱਡੇ ’ਤੇ ਸਵਾਗਤ ਲਈ ਪਹੁੰਚੇ ਤਾਂ ਚੌਹਾਨ ਉਨ੍ਹਾਂ ਨੂੰ ਆਪਣੀ ਗੱਡੀ ’ਚ ਨਾਲ ਲੈ ਕੇ ਪਿੰਡ ਬਦਰਪੁਰ ਲਈ ਰਵਾਨਾ ਹੋਵੇ। ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਵੀ ਗੱਡੀ ’ਚ ਸਨ। ਬਦਰਪੁਰ ਦੇ ਕਿਸਾਨ ਭੁਪਿੰਦਰ ਸਿੰਘ ਦੇ ਘਰ ਮੰਜਿਆਂ ’ਤੇ ਬੈਠ ਕੇ ਸ਼ਿਵਰਾਜ ਚੌਹਾਨ ਤੇ ਗੁਰਮੀਤ ਖੁੱਡੀਆਂ ਨੇ ਦੁਪਹਿਰ ਦਾ ਖਾਣਾ ਖਾਧਾ।
ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਵੀ ਗੱਡੀ ’ਚ ਸਨ। ਸੁਨੀਲ ਜਾਖੜ ਨੇ ਬਦਰਪੁਰ ਵਿਖੇ ਸਮਾਗਮਾਂ ’ਚ ਤਾਰੀਫ ਕਰਦਿਆਂ ਸ਼ਿਵਰਾਜ ਚੌਹਾਨ ਤੇ ਗੁਰਮੀਤ ਖੁੱਡੀਆਂ ਨੂੰ ‘ਖੇਤੀ ਵਜ਼ੀਰਾਂ’ ਦੀ ਹਿੱਟ ਜੋੜੀ ਕਰਾਰ ਦਿੱਤਾ। ਚੌਹਾਨ ਨੇ ਕਿਹਾ ਕਿ ਜਦੋਂ ਵੀ ਖੁੱਡੀਆਂ ਨੇ ਪੰਜਾਬ ਦੀ ਖੇਤੀ ਲਈ ਕੁਝ ਮੰਗਿਆ, ਉਨ੍ਹਾਂ ਨੇ ਫ਼ੌਰੀ ਦਿੱਤਾ। ਚੌਹਾਨ ਆਪਣੇ ਪਰਿਵਾਰਕ ਸਮਾਗਮਾਂ ਵਿੱਚ ਵੀ ਉਚੇਚੇ ਤੌਰ ’ਤੇ ਖੁੱਡੀਆਂ ਨੂੰ ਬੁਲਾਉਂਦੇ ਰਹੇ ਹਨ।ਇਸ ਤੋਂ ਪਹਿਲਾਂ ਦਿੱਲੀ ਵਿਖੇ ਕਾਨਫਰੰਸ ਦੌਰਾਨ ਸ਼ਿਵਰਾਜ ਚੌਹਾਨ ਨੇ ਕਣਕ ਦੀ ਸਬਸਿਡੀ ਲਈ ਮਨਜ਼ੂਰੀ ਪੱਤਰ ਗੁਰਮੀਤ ਖੁੱਡੀਆਂ ਨੂੰ ਪੱਤਰ ਸੌਂਪਿਆ ਸੀ। ਗੁਰਮੀਤ ਸਿੰਘ ਖੁੱਡੀਆਂ ਨੇ ਕਿਹਾ ਕਿ ਉਹ ਬਤੌਰ ਖੇਤੀ ਮੰਤਰੀ ਅੱਜ ਦੇ ਸਮਾਗਮਾਂ ਵਿੱਚ ਗਏ ਸਨ ਅਤੇ ਉਨ੍ਹਾਂ ਲਈ ਪੰਜਾਬ ਦੀ ਕਿਸਾਨੀ ਤਰਜੀਹੀ ਹੈ। ਉਨ੍ਹਾਂ ਦੀ ਹਾਜ਼ਰੀ ਦਾ ਕੋਈ ਸਿਆਸੀ ਤੁਅੱਲਕ ਨਹੀਂ ਹੈ। ਖੁੱਡੀਆਂ ਮਾਲਵਾ ਖ਼ਿੱਤੇ ’ਚ ਸੂਝਵਾਨ ਨੇਤਾ ਵਜੋਂ ਉੱਭਰੇ ਹਨ ਅਤੇ ਖੁੱਡੀਆਂ ਪਰਿਵਾਰ ਦਾ ਸਿਆਸਤ ਤੋਂ ਉਪਰ ਉੱਠ ਕੇ ਵੀ ਲੋਕਾਂ ’ਚ ਸਤਿਕਾਰ ਰਿਹਾ ਹੈ।
‘ਖੁੱਡੀਆਂ ਮਾਡਲ’ ’ਤੇ ਚੱਲੇ ਸਰਕਾਰ: ਸੁਨੀਲ ਜਾਖੜ
ਭਾਜਪਾ ਆਗੂ ਸੁਨੀਲ ਜਾਖੜ ਨੇ ‘ਆਪ’ ਨੂੰ ਮੁਖਾਤਿਬ ਹੁੰਦਿਆਂ ਕਿ ਪੰਜਾਬ ਦੇ ਮੁੱਖ ਮੰਤਰੀ ਅਤੇ ਬਾਕੀ ਵਜ਼ੀਰ ਵੀ ਜੇ ਖੇਤੀ ਮੰਤਰੀ ਗੁਰਮੀਤ ਸਿੰਘ ਖੁੱਡੀਆਂ ਵਾਂਗੂ ਕੇਂਦਰ ਸਰਕਾਰ ਕੋਲ ਖੇਤੀ ਪ੍ਰਾਜੈਕਟ ਲੈ ਕੇ ਜਾਂਦੇ ਤਾਂ ਖ਼ਾਲੀ ਮੁੜਨ ਦਾ ਸਵਾਲ ਹੀ ਪੈਦਾ ਨਹੀਂ ਹੋਣਾ ਸੀ। ਸਹਿਕਾਰੀ ਸੰਘਵਾਦ ਰਾਹੀਂ ਹੀ ਵਿਕਾਸ ਸੰਭਵ ਹੈ। ਕੇਂਦਰ ਨਾਲ ਵਿਵਾਦ ਖੜ੍ਹੇ ਕਰਨ ਦੀ ਥਾਂ ਸਹਿਚਾਰ ਨਾਲ ਚੱਲਣ ਵਾਲੀ ਸਰਕਾਰ ਹੋਵੇ ਤਾਂ ਹੀ ਪੰਜਾਬ ਨੂੰ ਮੁਸ਼ਕਲਾਂ ’ਚੋਂ ਕੱਢਿਆ ਜਾ ਸਕਦਾ ਹੈ। ਜਾਖੜ ਨੇ ਸ਼ਿਵਰਾਜ ਚੌਹਾਨ ਤੇ ਗੁਰਮੀਤ ਖੁੱਡੀਆਂ ਨੂੰ ‘ਖੇਤੀ ਵਜ਼ੀਰਾਂ’ ਦੀ ਹਿੱਟ ਜੋੜੀ ਦੱਸਿਆ।


.jpg)
.jpg)
.jpg)
.jpg)
.jpg)


.jpg)